BlogNa Urang Banua

LIMBAH tahu la­kinya kalah wak­tu pamilu sa­ma­lam, bini Gar­bus taum­pat jua pina pusing kapala, in­ya pusing ka­da­nya banyak ha­bis mu­dal, tapi ma­lihat Garbus u-u­ri­ngan limbah kalah.

Bini Palui nang man­da­ngar habar, langsung ma­hibur ka bini Garbus.

“Kada usah dipikirakan umanya ai, artinya balum rajaki laki ikam jadi anggota dewan,” ujar bini Palui manyabari.

“Amun aku kadapapa, na­ng maulah aku pusing ka­la­kuan abahnya itu nah pina manyarik-nyarik tarus saban hari,” ujar bini Garbus tau­ngut.

“Amun laki manyanyarik tu baarti ikam nang bisa-bisa manyabari,” ujar bini Palui pulang. “Tuhuk aku man­ya­bari, tatap haja inya kada kawa salah sadikit lalu bamamai ja gawiannya,” ujar bini Garbus ma­ngi­sa­hakan kalakuan lakinya.

“Kalu salah caranya ikam manyabari?” ujar bini Palui.

“Salah napanya? Bahimat kupadahi basabar-basabar, bawa sambahyang, ingat la­wan Tuhan,” ujar bini Gar­bus. “Kaya apa ini bini Pa­lui?” ujar bini Garbus ma­minta saran.

Lawas bini Palui ma­mi­kirakan kaya apa caranya supaya Garbus kada manyarik-nyarik lagi. Inya kasian jua lawan nang bini taumpat uuringan kadakaruan rasa.

“Aku ada saran, cubai pa­ng ikam bawai laki ikam man­yucuk lagi,” ujar bini Palui mamadahi.

“Hau, kanapa kaya itu? Urang ampih sudah pamilu, kanapa disuruh mayucuk ulang?” ujar bini Garbus hi­ran mandangar saran bini Palui. “Lawan wayah ini ka­da mu­sim lagi manyucuk, wa­yah ini pamilu itu mai­sinya di­con­teng,” ujarnya pulang.

“Akibat manyonteng itu jua laki ikam jadi u-uringan. Cubai ikam baduaan ma­ad­aakan pamilu baasa. Insya Allah bisa ampih kapala laki ikam,” ujar bini Palui.

Rupanya bini garbus pa­ham napa nang maksud bini Palui. Limbah manggawi sa­ran itu, isuknya inya la­ng­sung mangincang ka rumah Palui. Pina sanang banar inya.